Зиромин 500 мг № 3 табл покрытые оболочкой
Тауарлардың көрінісі фотосуретте көрсетілгеннен өзгеше болуы мүмкін

Зиромин 500 мг № 3 табл покрытые оболочкой

Қолжетімділігі
Тауар қолда жоқ
Үлгі
8680199091113
Елі
Великобритания
Өндіруші
World Medicine
  • Сипаттама

Сипаттама

Дәрілік препаратты медициналық қолдану

жөніндегі нұсқаулық (Қосымша парақ)

Саудалық атауы

Зиромин

Халықаралық патенттелмеген атауы

Азитромицин

Дәрілік түрі, дозалануы

Инфузия үшін ерітінді дайындауға арналған лиофилизацияланған ұнтақ, 500 мг

Фармакотерапиялық тобы

Жүйелі қолдануға арналған инфекцияға қарсы препараттар. Жүйелі қолдануға арналған бактерияға қарсы препараттар. Макролидтер, линкозамидтер және стрептограминдер. Макролидтер. Азитромицин.

АТХ коды J01FA10

Қолданылуы

Зиромин азитромицинге сезімтал патогенді микроорганизмдер туындатқан инфекцияларды бастапқы вена ішіне емдеу қажеттілігі бар пациенттерде қолдану үшін көрсетілген:

- легионеллезді қоса, ауруханадан тыс пневмония;

- асқынбаған жоғары аднексит.

Біріктірілген емді (мысалы, β-лактамды антибиотикпен бірге қолдану) ауыр/қатты өтетін пневмония және/немесе қатарлас қауіп факторлар бар болған кезде жүргізу қажет. Азитромицинмен монотерапия күрделі инфекциялар кезінде, әсіресе патогенді микроорганизмдерде азитромицинге резистенттіліктің болуын жоққа шығаруға болмайтын жағдайларда көрсетілмеген.

Бактерияға қарсы дәрілерді тиісінше пайдалану жөніндегі ресми нұсқаулықтарда қамтылған ақпаратты назарға алу қажет.

Қолдануды бастағанға дейін қажетті мәліметтер тізбесі

Қолдануға болмайтын жағдайлар

Азитромицинге, эритромицинге, кез келген макролидті немесе кетолидті басқа антибиотиктерге немесе препараттың қосымша заттарының кез келгеніне аса жоғары сезімталдық.

Басқа дәрілік препараттармен өзара әрекеттесуі

Антацидтер және тұз қышқылы секрециясының тежегіштері

Зерттеулердің бірінде бейорганикалық қосылыстар болып табылатын антацидтермен бір мезгілде қабылдаған кезде қан сарысуындағы азитромициннің (Cmax) ең жоғары концентрациясы 24% - ға төмендегені анықталды; бұл ретте дәрілік заттың сіңу дәрежесі кеміген жоқ ("концентрация-уақыт" қисығының астындағы аудан (AUC)мәні бойынша бағалау). Зироминді жоғарыда көрсетілген антацидтермен бір мезгілде қабылдауға болмайды, дәрілік заттарды қабылдау арасындағы аралық 2-3 сағатты құрауы тиіс.

Циметидин

Циметидин азитромициннің сіңу жылдамдығы мен дәрежесіне әсер еткен жоқ, сондықтан циметидинді Зироминмен бір мезгілде қабылдауға болады.

Цетиризин

Дені сау еріктілерде азитромицин мен цетиризинді (20 мг) 5 күн бойы тепе-тең жағдайда пайдаланған кезде фармакокинетикалық өзара іс-қимыл және QT аралық ұзақтығының елеулі өзгерістері байқалған жоқ.

Қастауыш алкалоидтары (қастауыш алкалоидтарының туындылары)

Осы уақытқа дейін азитромициннің дигидроэрготаминмен немесе гидрогенизацияланбаған қастауыш алкалоидтарымен қандай да бір өзара әрекеттесу тіркелмегеніне қарамастан, вазоконстрикторлық әсердің және қанайналым бұзылыстарының, әсіресе қол саусақтарында және аяқ башайларында, даму қаупін жоққа шығаруға болмайды. Сондықтан сақтық шарасы ретінде Зироминді қастауыш алкалоидтарымен және олардың туындыларымен біріктірілімде қолдануға болмайды.

Вирусқа қарсы дәрілер

Қазіргі уақытта азитромициннің вирусқа қарсы дәрілермен өзара әрекеттесуі туралы деректер көлемі дозалау режимін түзету бойынша ұсынымдар беру үшін жеткіліксіз болып табылады; төменде көрсетілген препараттармен өзара әрекеттесу зерттелген.

Зидовудин

Азитромицинді бір мезгілде қолданғанда (1000 мг дозада бір рет қабылдау; 600 мг немесе 1200 мг дозада көп реттік қабылдау) бүйрекпен шығарылуын қоса, зидовудин немесе оның глюкуронидтік метаболитінің фармакокинетикасына елеусіз әсер етті. Бұл ретте шеткері қанның мононуклеарлы жасушаларында фосфорланған зидовудин, клиникалық белсенді метаболит концентрациясының жоғарылауы байқалды; бұл жағдайдың клиникалық маңыздылығы белгісіз, дегенмен бұл пациенттер үшін артықшылық бола алады.

Диданозин

Адамның иммун тапшылығы вирусын (АИТВ) жұқтырған 6 пациентте азитромицинді (тәулігіне 1200 мг) және диданозинді (тәулігіне 400 мг) бірге қолданғанда диданозиннің фармакокинетикасы азитромициннің орнына плацебо алған пациенттерден айырмашылығы жоқ.

Рифабутин

Азитромицин мен рифабутинді біріктіріп қолданған кезде қан сарысуындағы екі дәрілік заттың орташа концентрациясы айтарлықтай өзгерген жоқ.

Азитромицин мен рифабутинді бір мезгілде қолданғанда пациенттерде нейтропения байқалған.

Дигоксин және колхицин (P-гликопротеин субстраттары)

Азитромицинді және дигоксин мен колхицин сияқты Р-гликопротеин субстраттарын қоса, макролидті антибиотиктерді бір мезгілде қолданғанда қан сарысуындағы соңғысының концентрациясының жоғарылауы байқалған. Зироминді және дигоксин сияқты P-гликопротеин субстраттарын бірге пайдаланған кезде соңғысының қан сарысуындағы концентрациясының жоғарылау қаупін ескеру керек. Зироминмен емдеуді тоқтатқан кезде және одан кейін клиникалық мониторинг жүргізу қажет; қажет болған жағдайда қан сарысуындағы дигоксин концентрациясын арттыру керек.

Азитромицин бауырдағы P450 цитохромы жүйесінің ферменттеріне айтарлықтай әсер етпейді. Азитромицинге эритромицин мен басқа макролидтер енетін фармакокинетикалық өзара әрекеттесулер тән болуы екіталай. Препарат метаболит-цитохром кешенінің түзілуі арқылы бауырдағы P450 цитохромы жүйесінің ферменттерін индукцияламайды және тежемейді. Клиникалық зерттеулерде аторвастатин, карбамазепин, эфавиренц, флуконазол, индинавир, метилпреднизолон, мидазолам, силденафил, триазолам, триметоприм/сульфаметоксазол біріктірілімі сияқты Р450 цитохром жүйесі ферменттерінің қатысуымен метаболизденетін азитромицин мен дәрілік заттардың арасындағы елеулі өзара әрекеттесуі байқалмаған. Дегенмен, жоғарыда аталған дәрілік заттарды Зироминмен бір мезгілде қолданған кезде сақ болу керек.

Аторвастатин

Азитромицинді (тәулігіне 500 мг) және аторвастатинді (тәулігіне 10 мг) бірге пайдаланған кезде қан плазмасындағы соңғысының концентрациясы өзгерген жоқ (3-гидрокси-3-метил-глютарил-кофермент A редуктазасын тежеуді зерттеу нәтижелері негізінде бағалау). Бұл ретте статиндермен біріктіріп азитромицин алған пациенттерде постмаркетингтік кезеңде рабдомиолиз жағдайлары тіркелді.

Теофиллин

Фармакокинетикалық және клиникалық зерттеулерде азитромицин мен теофиллин арасындағы өзара әрекеттесулер анықталған жоқ. Теофиллин мен басқа макролидтер арасындағы өзара әрекеттесулер туралы хабарламалардың болуына байланысты, Зироминді теофиллинмен бірге қолданғанда қан плазмасындағы соңғысының концентрациясының жоғарылауымен байланысты типтік симптомдарды анықтау мақсатында пациенттерге мұқият мониторинг жүргізу қажет.

Антикоагулянттар

Дені сау еріктілердегі фармакокинетикалық зерттеулерде азитромицин варфариннің антикоагулянттық әсеріне әсер еткен жоқ (бір рет 15 мг). Алайда, азитромицинмен бір мезгілде қабылдау кезінде кумарин қатарындағы пероральді антикоагулянттардың антикоагулянттық әсерінің күшеюі туралы хабарламалар бар, бұл ретте себеп-салдарлық байланыс орнатылмаған. Мұндай біріктірілімдерді пациенттерде пайдаланған кезде протромбин уақытына жиі мониторинг жүргізген жөн.

Циклоспорин

3 күн ішінде азитромицинді тәулігіне 500 мг дозада, содан кейін циклоспоринді 10 мг/кг дозада бір рет ішке қабылдаған дені сау еріктілердің қатысуымен жүргізілген фармакокинетикалық зерттеуде циклоспорин үшін Cmax және AUC0-5 мәндерінің едәуір артқаны анықталды. Зиромин мен циклоспорин препаратын бір мезгілде қолданғанда қан плазмасындағы циклоспорин концентрациясына сақ болу және бақылау, сондай-ақ оның дозасын тиісті түрде түзету керек.

Терфенадин

Фармакокинетикалық зерттеулерде азитромицин мен терфенадин арасындағы өзара әрекеттесу байқалған жоқ. Мұндай өзара әрекеттесу қаупін толығымен жоққа шығаруға болмайтын жағдайлар туралы сирек хабарламалар бар, бірақ бұл жағдайда дәрілік заттардың өзара әрекеттесуінің тікелей дәлелі табылған жоқ. Зиромин мен терфенадинді біріктіріп қолданғанда сақ болу керек.

Басқа антибиотиктер

Азитромицинге және макролидті антибиотиктерге (мысалы, эритромицин), сондай-ақ линкомицин мен клиндамицинге қатарлас резистенттіліктің даму қаупін назарға алған жөн; осы топтағы бірнеше дәрілік заттарды бірге пайдалану ұсынылмайды.

QT аралығын ұзартатын дәрілік заттар

Зироминді QT аралығын ұзартатын басқа дәрілік заттармен бір мезгілде қолдануға болмайды.

Нелфинавир

Нелфинавир (тәулігіне үш рет 750 мг) мен азитромицинді (1200 мг) тепе-теңдік күйде бірге пайдаланған кезде соңғысының қан плазмасындағы концентрациясы жоғарылаған; бұл ретте клиникалық маңызды жағымсыз реакциялар тіркелмеген, азитромицин дозасын түзету талап етілмейді.

Арнайы ескертулер

Гепатоуыттылық

Бауырдың ауыр аурулары бар пациенттерде Зироминді сақтықпен қолданған жөн, өйткені азитромициннің организмнен шығарылу процесінде гепатобилиарлық жүйе басым түрде қатысады. Азитромицинді қолдану кезінде бауыр функциясының бұзылуы, гепатит, холестаздық сарғаю, бауыр некрозы және бауыр жеткіліксіздігі, оның ішінде өліммен аяқталған жағдайлар туралы хабарланды;сонымен қатар, кейбір пациенттер дебауыр аурулары болған немесе олар басқа гепатоуытты препараттармен емделген.

Бауыр функциясының бұзылуын көрсететін симптомдар дамыған кезде (мысалы, сарғаюмен тез үдейтін астения, несептің күңгірттенуі, қан кетуге бейімділік немесе бауыр энцефалопатиясы) бауырдың функционалдық жағдайын дереу бағалау керек. Бауыр функциясының бұзылуы пайда болған кезде Зироминмен емдеуді тоқтату керек.

Балалардағы гипертрофиялық пилорикалық стеноз (IHPS)

Жаңа туған нәрестелерде эритромицинді қолданғаннан кейін (туғаннан кейінгі алғашқы 42 күндегі емдеу) гипертрофиялық пилорикалық стеноздың даму жағдайлары тіркелді. Егер баланы тамақтандыру кезінде құсу немесе тітіркену пайда болса, ата-аналар немесе балаға күтім жасайтын адамдар дәрігермен кеңесу керек. Clostridium difficile (CDAD) тудырған диарея

Азитромицинді қоса алғанда, антибиотиктердің көпшілігін қолданғанда Clostridium difficile туындатқан диареяның пайда болу жағдайлары туралы хабарланды, оның көріністерінің ауырлығы диареяның жеңіл түрінен өліммен аяқталған колитке дейін өзгеруі мүмкін. Антибиотикпен емдеу аясында ішек микрофлорасы өзгереді, бұл Clostridium difficile штаммдарының шамадан тыс өсуіне әкелуі мүмкін.

Clostridium difficile диареяның дамуына ықпал ететін А және В токсиндерін шығарады. Гипертоксин өндіретінClostridium difficile штаммдары анағұрлым жоғары ауру мен өлім-жітімді шарттайды, олар антибиотикпен емдеуге резистентті болуы мүмкін болғандықтан, колэктомия жасау қажет болуы мүмкін. Сондықтан антибиотиктерді қолданғаннан кейін диарея дамыған барлық пациенттерде Clostridium difficile туындаған диареяның туындау қаупін назарға алу керек. Сонымен қатар, мұндай пациенттерде анамнезді мұқият жинау керек, өйткені Clostridium difficile туындаған диарея антибиотиктерді қабылдағаннан кейін екі айдан кейін де дамуы мүмкін.

Жалған жарғақшалы колит

Жалған жарғақшалы колит жағдайлары макролидті антибиотиктерді қолданғаннан кейін тіркелді. Осыған байланысты азитромицинмен емдеуден кейін шамамен 3 апта ішінде пайда болатын диареясы бар пациенттерде осы аурудың даму қаупін ескеру керек. Зироминмен емдеу аясында пайда болған жалған жарғақшалы колиті бар пациенттерде ішек перистальтикасын төмендететін дәрілік заттарды қолдануға болмайды.

Суперинфекциялар

Зироминмен емдеу кезінде резистентті патогенді микроорганизмдерден (мысалы, зеңді инфекцияларының қоздырғыштары) туындаған суперинфекциядан туындаған симптомдардың даму қаупін ескеру керек). Суперинфекция дамыған кезде препаратты қабылдауды тоқтату және тиісті ем жүргізу қажеттілігі туындауы мүмкін.

Айқаспалы резистенттілік

Айқаспалы резистенттілікке байланысты Зироминмен емді эритромицинге резистентті грамоң микроорганизмдерден және метициллинге резистентті стафилококктар штаммдарының көпшілігінен туындаған инфекциялық аурулары бар пациенттерде жүргізуге болмайды. Географиялық аймақта эритромицинге және басқа антибиотиктерге резистентті микроорганизмдер штаммдарының таралуы туралы ақпаратты назарға алу қажет.

Бүйрек жеткіліксіздігі

Шумақтық сүзілу жылдамдығы 10 мл/мин-ден кем бүйрек жеткіліксіздігі бар пациенттерде ұсынылған дозада вена ішіне енгізу кезінде азитромицинді қолдану қауіпсіздігі туралы деректер жоқ. Қазіргі уақытта шумақтық сүзілу жылдамдығы 10-80 мл/мин құрайтын пациенттерде дәрілік заттың дозасын түзету талап етілмейтіні анықталды.

Ұзақ қолдану

Жоғарыда көрсетілген көрсеткіштер кезінде азитромицинді ұзақ уақыт қолданудың қауіпсіздігі мен тиімділігі туралы деректер жоқ. Жиі қайталанатын инфекциялар кезінде баламалы антибиотиктерді қолдану туралы мәселені қарастырған жөн.

Фарингит/тонзиллит

Зироминмен Streptococcus pyogenes туындатқан фарингитті немесе тонзиллитті емдеуге арналған таңдау препараты болып табылмайды. Пенициллин жедел ревматизмдік қызбаны емдеу және алдын-алу үшін таңдау препараты болып табылады.

Синусит

Зиромин көбінесе синуситті емдеуге арналған дәрі болып табылмайды.

Жедел ортаңғы отит

Зиромин көбінесе жедел ортаңғы отитті емдеуге арналған дәрі болып табылмайды.

Инфекция жұққан күйіктер

Зиромин инфекция жұққан күйікті емдеуге арналмаған.

Венерологиялық аурулар

Жыныстық жолмен берілетін инфекциялар кезінде Treponema pallidum туындатқан қатар жүретін аурудың болуын болдырмау керек.

Неврологиялық және психикалық бұзылулар

Неврологиялық және психикалық бұзылулары бар пациенттерде Зироминді сақтықпен қолданған жөн.

Аса жоғары сезімталдық

Азитромицинді пайдалану кезінде эритромицинді немесе басқа макролидтерді қолданғандағыдай, сирек жағдайларда ангионевроздық ісінуді және анафилаксияны (сирек өліммен аяқталатын), жедел жайылған экзантематозды пустулезді (AGEP), Стивенс-Джонсон синдромын (SJS), уытты эпидермальді некролизді (TEN) (сирек өліммен аяқталатын) қоса алғанда, ауыр аллергиялық реакциялар және эозинофилиямен және жүйелік симптомдармен дәрілік реакция (DRESS) байқалды. Азитромицинді қолданумен байланысты жоғарыда аталған реакциялардың кейбірі қайталанатын симптомдармен қатарлас жүрді және ұзаққа созылатын уақыт бақылау мен емдеуді қажет етті. Аллергиялық реакция туындаған жағдайда, Зироминді қолдануды тоқтатып, тиісті емдеуді бастау қажет. Симптоматикалық емді тоқтатқаннан кейін аллергия симптомдары қайтадан пайда болуы мүмкін екенін есте ұстаған жөн.

Қастауыш алкалоидтары (қастауыш алкалоидтарының туындылары)

Қастауыш алкалоидтары мен макролидті антибиотиктерді бір мезгілде қолданғанда эрготизм анағұрлым қысқа мерзімде дамығаны анықталды. Азитромицин мен қастауыш алкалоидтарының өзара әрекеттесуі зерттелмеген. Эрготизмнің даму қаупіне байланысты Зироминді және қастауыш алкалоидтарының туындыларын бірге қолдануға болмайды.

QT аралығының ұзаруы

Азитромицинді қоса, макролидтермен ем қабылдаған пациенттерде жүректің реполяризация фазасының ұзаруы және QT аралығының ұзаруы байқалды, бұл "пируэт" типті жүрек аритмиясы мен қарыншалық тахикардияның даму қаупімен байланысты. Зироминді қолданар алдында қауіптілігі жоғары пациенттерде пайда/қауіп арақатынасын бағалау кезінде QT аралығының ұзару қаупін ескеру қажет, себебі осының нәтижесінде жүрек тоқтап қалуы (кейде өліммен аяқталуы) туындауы мүмкін.

QT аралығының ұзаруына қатысты қауіп топтары:

- туа біткен немесе құжатпен расталған QT аралығының ұзаруы жүре пайда болған түрлері бар пациенттер;

- ІА класының (хинидин және прокаинамид) және III класының (дофетилид, амиодарон және соталол) аритмияға қарсы препараттар, цисаприд және терфенадин, психозға қарсы дәрілер (пимозид), антидепрессанттар (циталопрам), фторхинолондар (моксифлоксацин және левофлоксацин) сияқты QT аралығын ұзартатын басқа дәрілік заттармен бір мезгілде ем алатын пациенттер;

- су-электролит теңгерімінің бұзылуы, әсіресе гипокалиемия және гипомагнемиясы бар пациенттер;

- клиникалық тұрғыдан маңызы бар брадикардиясы, жүрек аритмиясы немесе ауыр жүрек жеткіліксіздігі бар пациенттер;

- әйел пациенттер және бұрыннан проаритмиясы бар егде жастағы пациенттер.

Миастения гравис

Азитромицинмен емдеу кезінде пациенттерде миастения гравис симптомдары асқынған немесе миастениялық синдром дамыған деген хабарламалар бар.

Қосымша заттар

Бір құтыдағы Зироминнің құрамында 1 ммольден аз натрий (23 мг) бар, яғни іс жүзінде "құрамында натрий жоқ". Мұны натрий мөлшері/тұзы аз диетаны ұстанатын пациенттер ескеруі керек.

Дәрілік затты жоғарыда көрсетілген ұсынымдарға сәйкес еріту және сұйылту керек және ұзақтығы кемінде 180 минутты құрайтын вена ішіне инфузия түрінде енгізу қажет. Зиромин венаішілік болюсті инъекция түрінде немесе бұлшықет ішіне енгізуге арналмаған.

Педиатрияда қолдану

Балалар мен жасөспірімдердегі инфекцияларды емдеу кезінде препаратты қолданудың тиімділігі мен қауіпсіздігін зерттеу жүргізілген жоқ.

Жүктілік немесе лактация кезінде

Жүктілік

Қазіргі уақытта жүкті әйелдерде Зироминді қолдану туралы деректер жеткіліксіз. Зироминді жүкті әйелдерде бұл аса қажет болған жағдайларда ғана қолданған жөн, өйткені қазіргі уақытта препаратты қолдану қауіпсіздігіне түпкілікті баға беру мүмкін емес.

Емшек емізу

Азитромицин емшек сүтімен шығарылады. Азитромициннің емшек сүтімен қоректенетін балаға әсері зерттелмегендіктен, бала емізу кезінде әйелдерде Зироминді қолдануға болмайды. Емшек сүтімен қоректенетін балада сезімталдық, диарея және микоздық инфекция байқалуы мүмкін. Препаратпен емдеу кезінде және ол аяқталғаннан кейін 2 күн ішінде емшек сүтін сүзіп, утилизациялау ұсынылады, содан кейін бала емізуді қайта бастауға болады.

Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Азитромицинді қолдану тәжірибесі, әдетте, препарат зейін қою қабілетіне және реакция жылдамдығына әсер етпейтінін көрсетеді. Алайда, пайда болған жағымсыз реакциялар реакция жылдамдығын өзгерте алады және көлік құралдарын жүргізу және механизмдерді басқару қабілетіне әсер етуі мүмкін.

Қолдану бойынша ұсынымдар

Дозалау режимі

Ересек пациенттер

Ауруханадан тыс пневмония: ұсынылған доза кемінде 2 күн бойы тәулігіне бір рет вена ішіне 500 мг азитромицинді құрайды. Венаішілік емнен кейін дәрілік затты пероральді түрде (Зиромин қабықпен қапталған таблеткалар) пайдалана отырып, тәулігіне бір рет 500 мг дозада азитромицинмен емдеуді жалғастыру керек. Емдеудің жалпы ұзақтығы 7-10 күнді құрайды.

Асқынбаған өрлемелі аднексит: ұсынылған доза тәулігіне бір рет 1-2 күн ішінде вена ішіне 500 мг азитромицинді құрайды. Венаішілік емнен кейін дәрілік затты пероральді түрде (Зиромин қабықпен қапталған таблеткалар) пайдалана отырып, тәулігіне бір рет 250 мг дозада азитромицинмен емдеуді жалғастыру керек. Емдеудің жалпы ұзақтығы 7 күнді құрайды.

Венаішілік емнен пероральді емге өту уақытын емдеуші дәрігер пациенттің емдеуге клиникалық жауабын ескере отырып анықтайды.

Пациенттердің ерекше топтары

Егде жастағы пациенттер

Егде жастағы пациенттерде дәрілік затты ересектердегідей дозада қолдану керек. Егде жастағы пациенттерде жүрек аритмиясының туындауына бейімділік болуы мүмкін, сондықтан мұндай пациенттерде Зироминді қолданған кезде "пируэт" типті жүрек аритмиясы мен қарыншалық тахикардияның даму қаупіне байланысты ерекше сақ болу керек.

Балалар мен жасөспірімдер

Балалар мен жасөспірімдердегі инфекцияларды емдеу кезінде препаратты қолданудың тиімділігі мен қауіпсіздігін зерттеу жүргізілген жоқ.

Дене салмағы 45 кг-ден кем балалар мен жасөспірімдерге суспензия түрінде (Зиромин ішке қабылдау үшін суспензия дайындауға арналған ұнтақ) Зироминді қабылдау ұсынылады.

Бүйрек функциясы бұзылған пациенттер

Шумақтық сүзілу жылдамдығы 10-80 мл/мин құрайтын, бүйрек функциясы бұзылған пациенттерде дәрілік заттың дозасын түзету талап етілмейді.

Бауыр функциясы бұзылған пациенттер

Бауырдың ауыр аурулары бар пациенттерде Зироминді сақтықпен қолдану керек.

Енгізу әдісі мен жолы

Ерігеннен және сұйылтылғаннан кейін дәрілік затты тек вена ішіне инфузия түрінде енгізу керек. Зиромин венаішілік болюсті инъекция түрінде немесе бұлшықет ішіне енгізуге арналмаған.

Инфузияға арналған ерітіндідегі азитромицин концентрациясы 1 мг/мл құрауы тиіс; венаішілік инфузияның ұзақтығы кемінде 180 минут болуы тиіс.

Вена ішіне инфузия үшін ерітінді дайындау

Ұнтақты еріту

Құтының ішіндегісіне (инфузияға ерітінді дайындауға арналған 500 мг азитромицин ұнтағы) инъекцияға арналған 4,8 мл су қосады (құтыны ұнтақтың барлығы ерігенше шайқайды). Алынған ерітіндінің (концентраттың) 1 мл-де азитромициннің құрамы 100 мг құрауы тиіс. Инъекцияға арналған су көлемін дәл өлшеу үшін 5 мл стандартты шприцті қолдану ұсынылады (4,8 мл).

Вена ішіне енгізуге арналған ерітіндіні қолданар алдында бөлшектердің бар-жоғын көзбен тексеру қажет. Құрамында бөлшектер бар дайындалған ерітінділерді утилизациялау қажет.

Қолданар алдында ерітіндіні тағы да сұйылту керек.

Инфузия үшін дайын ерітіндіні сұйылту және пайдалану

Алынған концентрат (5 мл, азитромицин концентрациясы 100 мг/мл) 500 мл көлеміндегі төмендегі ерітінділердің біріндесұйылтылады: 0,9% натрий хлориді ерітіндісі, 0,45% натрий хлориді ерітіндісі, 5% глюкозаның сулы ерітіндісі, Рингер-лактат ерітіндісі, Рингер-лактат ерітіндісіндегі 5% глюкоза ерітіндісі, 0,3% натрий хлориді ерітіндісіндегі 5% глюкоза ерітіндісі, 0,45% натрий хлориді ерітіндісіндегі 5% глюкоза ерітіндісі. Дайын ерітіндідегі азитромициннің соңғы концентрациясы 1,0 мг/мл болуы тиіс.

Артық дозалану жағдайында қабылдануы қажет шаралар

Дәрілік затты ұсынылған дозадан асатын дозаларда қолдану кезінде туындайтын жағымсыз реакциялар ұсынылған дозаларда қабылдау кезінде байқалатын жағымсыз реакцияларға ұқсас.

Симптомдары

Макролидті антибиотиктің артық дозалануының әдеттегі симптомдарына естудің қайтымды жоғалуы, айқын жүрек айну, құсу және диарея жатады.

Емі

Артық дозаланған жағдайда, қажет болған жағдайда өмірлік маңызды функциялардың сақталуын қамтамасыз ету және жалпы симптоматикалық ем жүргізу керек.

Дәрілік препаратты қолдану тәсілін түсіндіру үшін медицина қызметкерінің кеңесіне жүгіну бойынша ұсынымдар

Дәрілік препаратты қолданар алдында дәрігерге немесе фармацевтке кеңес алу үшін жүгініңіз.

ДП стандартты қолдану кезінде пайда болатын жағымсыз реакциялардың сипаттамасы және бұл жағдайда қабылдануы тиіс шаралар

Жағымсыз реакциялар жиілігінің параметрлері былайша анықталады: өте жиі (≥ 1/10); жиі (≥ 1/100, бірақ < 1/10); жиі емес (≥ 1/1000, бірақ < 1/100); сирек (≥ 1/10000, бірақ < 1/1000); өте сирек (< 1/10000); жиілігі белгісіз (қолда бар деректер бойынша бағалау мүмкін емес).

Көбінесе азитромицинді вена ішіне енгізгенде, одан кейін оны пероральді қабылдағанда ауруханадан тыс пневмонияны емдеу кезінде диарея/сұйық нәжіс, жүрек айнуы, іштің ауыруы және құсу сияқты жағымсыз реакциялар тіркелді. Азитромицинді вена ішіне енгізген кезде инфузия орнында қабыну және ауыру білінген.

Азитромицинді вена ішіне енгізгенде, одан кейін асқынбаған жоғары аднекситті емдеу кезінде пероральді қабылдаған кезде диарея, жүрек айнуы, іштің ауыруы, тәбеттің төмендеуі, бөртпе, қышыну және қынаптық инфекциялар сияқты жағымсыз реакциялар анағұрлым жиітіркелді.

Клиникалық зерттеулерде эритромицин мен метронидазолды бір мезгілде қолданған кезде жүрек айнуы, іштің ауыруы, құсу, инфузия орнындағы реакциялар, стоматит, бас айналуы және ентігу сияқты жағымсыз реакциялар салыстырмалы түрде жиі байқалды.

Клиникалық зерттеулерде және маркетингтен кейінгі кезеңде байқалған және азитромицинді қолданумен байланысты немесе байланысты болуы мүмкін жағымсыз реакциялар

Инфекциялық және паразиттік аурулар: жиі емес - кандидоз, қынап инфекциялары, пневмония, зеңдік инфекция, бактериялық инфекция, фарингит, гастроэнтерит, респираторлық аурулар, ринит, ауыз қуысының кандидозы; жиілігі белгісіз - жалған жарғақшалы колит.

Қан және лимфа жүйесі тарапынан: жиі емес - лейкопения, нейтропения, эозинофилия; жиілігі белгісіз - тромбоцитопения, гемолиздік анемия.

Иммундық жүйе тарапынан: жиі емес - ангионевроздық ісіну, аса жоғары сезімталдық реакциялары; жиілігі белгісіз-ауыр (кейде өмірге қауіп төндіретін) анафилаксиялық реакциялар (мысалы, анафилаксиялық шок).

Зат алмасу және тамақтану жағынан: жиі емес - анорексия.

Психикалық бұзылулар: жиі емес - күйгелектік, ұйқысыздық; сирек - ажитация; жиілігі белгісіз - озбырлық, үрей, сандырақтау, елестеулер.

Жүйке жүйесі тарапынан: жиі - бас ауыруы; жиі емес - бас айналу, ұйқышылдық, дәм сезудің бұзылуы, парестезия; жиілігі белгісіз - естен тану, құрысулар, гипестезия, психомоторлы қозу, иіс/дәм сезудің жоғалуы, паросмия, миастения гравис.

Көру мүшесі тарапынан: жиі емес - көрудің бұзылуы.

Есту мүшелері тарапынан және лабиринтті бұзылулар: жиі емес - есту мүшелері тарапынан бұзылулар, вертиго; жиілігі белгісіз - кереңдік және/немесе құлақтағы шуды қоса алғанда, естудің бұзылуы.

Жүрек тарапынан: жиі емес - пальпитация; жиілігі белгісіз - "пируэт" типті қарыншалық тахикардия, қарыншалық тахикардияны қоса аритмия, электрокардиограммада QT аралығының ұзаруы.

Тамырлар тарапынан: жиі емес - ысыну; жиілігі белгісіз-артериялық гипотензия.

Тыныс алу жолдары жүйесі, кеуде қуысы ағзалары мен көкірек ортасы тарапынан: жиі емес - ентігу, мұрыннан қан кету.

Асқазан-ішек жолы тарапынан: өте жиі - диарея; жиі - құсу, іштің ауыруы, жүрек айну; жиі емес - іш қату, метеоризм, диспепсия, гастрит, дисфагия, іштің кебуі, ауыздың құрғауы, кекіру, ойық жаралы стоматит, сілекейдің көп бөлінуі, сұйық нәжіс; жиілігі белгісіз - панкреатит, тіл түсінің өзгеруі.

Бауыр мен өт шығару жолдары тарапынан: сирек - бауыр функциясының бұзылуы, сарғаю, холестаз; жиілігі белгісіз - бауыр жеткіліксіздігі (өліммен аяқталатын сирек жағдайларда), гепатит, бауыр некрозы.

Тері және тері асты тіндері тарапынан: жиі емес - бөртпе, қышыну, есекжем, дерматит, терінің құрғауы, шамадан тыс терлеу; сирек - фотосезімталдық реакциялары, жедел жайылған экзантематозды пустулез, эозинофилиямен және жүйелі симптомдармен дәрілік реакция (жағымсыз реакциялар жиілігін бағалау үшін "үш ереже" қолданылды); жиілігі белгісіз - Стивенс-Джонсон синдромы, уытты эпидермальді некролиз, мультиформалы эритема.

Қаңқа-бұлшықет және дәнекер тін тарапынан: жиі емес - остеоартрит, миалгия, арқаның ауыруы, мойынның ауыруы; жиілігі белгісіз - артралгия.

Бүйрек және несеп шығару жолдары тарапынан: жиі емес-дизурия, бүйректің ауыруы; жиілігі белгісіз - интерстициальді нефрит, жедел бүйрек жеткіліксіздігі.

Жыныс мүшелері мен сүт бездері тарапынан: жиі емес - метроррагия, аталық без функциясының бұзылуы.

Жалпы бұзылулар мен енгізу орнындағы бұзылулар: жиі емес - ісіну, астения, дімкәстік, шаршау, беттің ісінуі, кеуденің ауыруы, дене температурасының жоғарылауы, ауыру, шеткері ісінулер.

Зертханалық және аспаптық зерттеулер нәтижелеріне әсері: жиі - қандағы лимфоциттер санының төмендеуі, қандағы эозинофилдер санының артуы, қандағы бикарбонаттар деңгейінің төмендеуі, қандағы базофилдер, моноциттер мен нейтрофилдер санының артуы; жиі емес - қандағы аспартатаминотрансфераза, аланинаминотрансфераза, билирубин, мочевина және креатинин деңгейлерінің жоғарылауы, қандағы калий концентрациясының өзгеруі, қандағы сілтілік фосфатаза, хлоридтер, глюкоза деңгейлерінің жоғарылауы, қандағы тромбоциттер санының жоғарылауы, гематокриттің төмендеуі, қандағы бикарбонаттар деңгейінің жоғарылауы, қандағы натрий концентрациясының өзгеруі.

Жарақаттар, уыттану және манипуляциялардың асқынуы: жиі емес - хирургиялық араласымнан кейінгі асқынулар.

Клиникалық зерттеулерде және маркетингтен кейінгі кезеңде де байқалған және Mycobacterium avium (түрі немесе жиілігі бойынша олар тез арада босап шығатын дәрілік түрлерді немесе баяу босап шығатын дәрілік түрлерді қолданумен байланысты жағымсыз реакциялардан ерекшеленеді) туындатқан инфекциялардың профилактикасы немесе емі ретінде азитромицинді қолданумен байланысты немесе байланысты болуы мүмкін жағымсыз реакциялар

Зат алмасу және тамақтану жағынан: жиі - анорексия.

Жүйке жүйесі тарапынан: жиі - бас айналуы, бас ауыруы, парестезия, дәм сезудің бұзылуы; сирек - гипестезия.

Көру мүшесі тарапынан: жиі - көрудің бұзылуы.

Есту мүшесінің тарапынан және лабиринтті бұзылулар: жиі - кереңдік; сирек - естудің бұзылуы, құлақтағы шуыл.

Жүрек тарапынан: сирек - пальпитация.

Асқазан-ішек жолы тарапынан: өте жиі - диарея, іштің ауыруы, жүрек айнуы, метеоризм, іштің жайсыздығы, сұйық нәжіс.

Бауыр және өт жолдары тарапынан: сирек - гепатит.

Тері және тері асты тіндері тарапынан: жиі - бөртпе, қышыну; сирек - Стивенс-Джонсон синдромы, фотосезімталдық реакциялары.

Қаңқа-бұлшықет және дәнекер тін тарапынан: жиі - артралгия.

Жалпы бұзылулар мен енгізу орнындағы бұзылулар: жиі - шаршау; сирек - астения, дімкәстік.

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) бойынша ақпараттық деректер базасына тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препараттың құрамы

1 құтының ішінде

белсенді зат - азитромицин дигидраты 524,1 мг (500 мг азитромицинге баламалы)

қосымша заттар: лимон қышқылы моногидраты, декстран 40 (инъекцияға арналған), маннит, натрий гидроксиді, сұйылтылған хлорсутек қышқылы.

Сыртқы түрінің, иісінің, дәмінің сипаттамасы

Ақ немесе ақ дерлік түсті лиофилизацияланған ұнтақ.

Шығарылу түрі және қаптамасы

Бромбутил тығынмен және Flip off типті қалпақшамен тығындалған, 500 мг түссіз шыны құтыдағы инфузия үшін ерітінді дайындауға арналған ұнтақ.

1 құты медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынған.

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Сақтау шарттары

25°С-ден аспайтын температурада сақтау керек.

Дайындалған ерітінді 25°С-ден аспайтын температурада 24 сағат бойы немесе 2°С-ден 8°С-ге дейінгі температурада 7 күн бойы тұрақты болады.

Балалардың қолы жетпейтін жерде сақтау керек!

Дәріханалардан босатылу шарттары

Рецепт арқылы.

Өндіруші туралы мәліметтер

«Мефар Илач Санайии А.Ш.», Түркия.

Рамазаноглу Мах.Энсар Джад№ 20, TR-34906 Курткей, Пэндик, Стамбул, Түркия.

Тел: +90 216 378 44 00

Факс: +90 216 378 44 00

E-mail: ik@mefar.com

Тіркеу куәлігінің ұстаушысы

«Уорлд Медицин Илач Сан. ве Тидж. А.Ш.», Түркия

15 Теммуз Мах., Джами Йолу Джад № 50, Гюнешли, Багджылар, Стамбул, Түркия.

Тел: +90 212 474 70 50

Факс: +90 212 474 09 01

http://www.worldmedicine.com.tr

Қазақстан Республикасының аумағында тұтынушылардан дәрілік зат бойынша шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электронды пошта)

"TROKA-S PHARMA" ЖШС, ҚР, Алматы,Сүйінбай д-лы, 222 б

Тел/факс:8 (7272) 52-90-90

www.worldmedicine.kz

Қазақстан Республикасының аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

"TROKA-S PHARMA" ЖШС, Алматы, Сүйінбай д-лы, 222 б

Ұялы тел +7701-786-33-98

e-mail: pvpharma@worldmedicine.kz